upphafið

Styrktarklúbburinn opnaði fyrst 30.ágúst 2015 og átti að verða samfélagsmiðill fyrir fólk sem fannst gaman að lyfta þungum hlutum og borða hollt. Það mistókst algjörlega. Fólk notar bara Facebook til að ræða svona hluti og því breyttist hlutverk Styrktarklúbbsins.

Vefsíðan varð að þjálfunarsíðu Skúla Pálmasonar, einkaþjálfara í Reebok Fitness Holtagörðum.

sterkar stelpur þjálfunin fæðist

Þetta sama haust fer Skúli að þjálfa stelpur í litlum hópum undir heitinu STERKAR STELPUR. Þjálfunin byrjaði smátt, með einum og svo tveimur hópum af stelpum sem vildu læra að gera æfingarnar rétt, styrkjast og líta betur út. Smám saman varð eftirspurnin meiri og Skúli hætti alfarið að þjálfa annað en STERKAR STELPUR hópeinkaþjálfunina um áramótin 2015. Hópeinkaþjálfunin fór svo í frí 2017.

sterkar stelpur áskorunin

Í lok mars 2016 ákveður Skúli svo að gefa aðeins af sér til að þakka fyrir viðtökurnar í hópeinkaþjálfuninni. Hann gefur öllum þeim konum sem vilja 3 mánaða þjálfunarprógramm undir heitinu STERKAR STELPUR ÁSKORUNIN. Viðtökurnar voru vægast sagt frábærar en um 3700 konur ákváðu að skrá sig til leiks. Fréttamiðlar fjölluðu um áskorunina og fjölluðu meðal annars DV, MBL og Pressan um málið. Jóhanna Njálsdóttir sigraði fyrstu STERKAR STELPUR ÁSKORUNINA með yfirburðum. Næsta áskorun hófst svo í September 2016 og sigraði Margrét Ásgerður þá áskorun. Nú eru áskoranirnar orðnar fimm talsins. Árangursmyndir stelpnanna má sjá hér að ofan.

Lesa um næstu áskorun!

teymið stækkar!

Í mars 2017 bættist Helena Dögg í STERKAR STELPUR teymið og sá alfarið um hópeinkaþjálfunina seinnipart dags og tók svo alveg við af Skúla í hópeinkaþjálfuninni á meðan hann var í fæðingarorlofi.

Helena Dögg er fædd og uppalin í Breiðholtinu góða. Hún er kannski óhefðbundinn einkaþjálfari því hún stundaði engar skipulagðar íþróttir og fór ekkert í líkamsrækt fyrr en daginn sem Reebok Fitness opnaði. 

Þá var ekki aftur snúið og í kjölfarið jókst áhuginn á hreysti, mannslíkamanum og andlegri líðan og lauk hún 240 stunda jógakennaranámi vorið 2014 og ÍAK Einkaþjálfunarréttindin komu svo vorið 2016. Helena hefur þjálfað, kennt jóga og Crossfit í Reebok síðustu ár. 

Helena er auk þess kaffibarþjónn, vinnur með börnum og hugsar um lítinn kettling heima fyrir. Hún er mikill náttúruunnandi, landslagsperri, mikill áhugamaður um mat og dýravinur.

Helena fór í nám og hætti að þjálfa hjá Styrktarklúbbnum 2018.

Helena Dögg

Haustið 2018 bættist Ester María í hópinn en hún fór í gegnum Precision Nutrition Level 1 og kemur til með að taka yfir ProCoach næringarþjálfunina frá og með janúar 2019.

Ester María er skagastelpa í húð og hár, enda fædd og uppalin á Akranesi.

Heilsusamlegur lífstíll  hefur alltaf verið hennar helsta áhugamál. Eftir framhaldsskóla hóf hún nám í næringarfræði við Háskóla Íslands. Hún tók sér frí frá námi til þess að ferðast og hugsa um sjálfa sig en lauk svo náminu vorið 2016. Strax haustið eftir skellti hún sér annað í B.Sc. nám en þá varð sálfræði fyrir valinu en hún kláraði B.Sc. gráðuna vorið 2019.

Í dag stundar hún lyftingar og jóga af krafti. Auk þess nýtir hún lausan frítíma í útiveru, hvort sem það er á formi göngutúra, útihlaupa, fjallgöngu eða sjósunds. Önnur áhugamál eru flest allt sem viðkemur sálfræði og mataræði, ferðalög, myndlist og samvera með fólkinu sem henni þykir vænt um.

Linda slóst í hópinn vorið 2019 og byrjaði að sjá um ýmislegt tengt grúbbunum okkar. Hún er úr Kópavoginum en hefur búið á Norðurlöndunum síðastliðin 7 ár.

Hún var að nálgast fertugt þegar hún keypti sitt fyrsta kort í ræktina. Eftir að hafa eignast seinni son sinn 15 árum á eftir þeim fyrri, alltof þung og orkulaus, fann hún að það þurfti meira til en göngutúra til að nálgast fyrra form. Skrefin í ræktina voru þung og eftir að hafa sett sér markmið að taka morgunsturtuna í ræktinni vann hún sig hægt og bítandi að lóðunum.

Þá var ekki aftur snúið og ekki löngu síðar hóf hún nám í ÍAK einkaþjálfun sem hún lauk 2010. Eftir löng veikindi skráði hún sig svo í Sterkar Stelpur í janúar 2017 og þá var ekki aftur snúið!

Linda stundar styrktarþjálfun af krafti og gengur helst allra sinna ferða. Þar fyrir utan eru áhugamálin Salsa og magadans. Auk þess les hún mikið og er yfirleitt skráð í einhverskonar fjarnám til að nýta það áhugamál sem best. Núna er hún að ljúka námi í Kostholdsveiledning (mataræðisráðgjöf) frá Tunsberg Medisinske skole í Noregi.

Upload Image...

en hver er skúli?

Skúli er Grindvíkingur, heimshornaflakkari, smá tölvunörd og einkaþjálfari með sjúkraþjálfunarmenntun.

Eftir að hafa skoðað heiminn eftir menntaskóla byrjaði Skúli í heilbrigðisverkfræði í HR árið 2008 en fann sig enganveginn þar. Hann hætti áður en fyrstu önninni var lokið og skráði sig strax í íþróttaakademíu Keilis og byrjaði í ÍAK einkaraþjálfaranáminu strax í janúar 2009. Hann fann sig mjög vel í því námi og ákvað að hann þyrfti að læra enn meira um mannslíkamann. Næsta skref var sjúkraþjálfun. Strax um vorið ákvað hann að prófa inntökuprófið til að sjá hverju hann ætti von á árið eftir. Hann var við það að gefast upp í prófinu en komst inn í námið. Eitthvað sem hann hafði ekki planað og búið sig undir.

Í stað þess að bíða í ár með að byrja í sjúkraþjálfun ákvað hann að taka þetta bara bæði á sama tíma; klára seinni önnina í ÍAK og byrja fyrstu önnina í sjúkraþjálfun. Þetta var strembið en Skúli komst í gegnum ÍAK einkaþjálfarann og hin þrjú árin í sjúkraþjálfaranum.

Á meðan náminu stóð þjálfaði Skúli alltaf eitthvað með skólanum; í Sporthúsinu, World Class og svo í stuttan tíma í eigin aðstöðu ásamt 4 félögum sem fór svo hrikalega á hausinn.

Skúli útskrifaðist svo með B.Sc. gráðu í sjúkraþjálfun vorið 2013 og fer þá í annað langt ferðalag um Asíu. Algjörlega peningalaus kemur hann heim, flytur heim til mömmu og pabba og vinnur í löndun og fiskvinnslu í nokkra mánuði. 

Hann fær fljótt leið á því og kemst inn sem þjálfari hjá Reebok Fitness í byrjun árs 2014. Þjálfunin byrjaði rólega en fór svo að taka við sér og fyrir utan 2 löng ferðalög hefur Skúli verið að þjálfa í Reebok Fitness síðan þá. Lengst af í Holtagörðum en sumarið 2018 flutti hann í göngufjarlægð frá sundlaug Kópavogs og byrjaði að þjálfa þar. Hann hefur aldrei fundið löngun til að starfa sem sjúkraþjálfari þó svo hann sjái alls ekki eftir þessu námi. Það hjálpar gríðarlega í þjálfuninni og hann er að vinna ekki síður mikilvægt starf í forvörnum.

Þetta er ekki fyrsta þjálfunarsíða Skúla en hann stofnaði líka Púlsþjálfun.is og Markmiðsþjálfun.is áður en hann hannaði og setti upp þennan gullfallega vef. Síðan fékk væna yfirhalningu í desember 2016.

Skúli er mjög duglegur að lesa um allt sem tengist þjálfun og næringu og tók tvö heljarinnar námskeið 2016; CPPS réttindi og Precision Nutrition næringarþjálfunarnámskeið sem hann nýtir í að bjóða upp á 12 mánaða næringarþjálfun í takmörkuðum hópum. 

Á vormánuðum 2018 kláraði Skúli svo CPPC, þjálfunarréttindi fyrir konur á meðgöngu og eftir barnsburð ásamt því að klára Level II næringarþjálfun hjá Precision Nutrition, sem var 12 mánaða stíft prógramm.

Eftir að hann eignaðist son sinn, hann Óðinn í September 2017 hefur Skúli alfarið sinnt þjálfun í gegnum netið og tekið að sér einstaka kúnna í einkaþjálfun í Sundlaug Kópavogs.

réttindi sem skúli hefur lokið

viltu vita meira?

Nafn (Nauðsynlegt)

Email (Nauðsynlegt)

Efni

Skilaboð