en hver er skúli?
Skúli er Grindvíkingur, heimshornaflakkari, smá tölvunörd og einkaþjálfari með sjúkraþjálfunarmenntun.
Eftir að hafa skoðað heiminn eftir menntaskóla byrjaði Skúli í heilbrigðisverkfræði í HR árið 2008 en fann sig enganveginn þar. Hann hætti áður en fyrstu önninni var lokið og skráði sig strax í íþróttaakademíu Keilis og byrjaði í ÍAK einkaraþjálfaranáminu strax í janúar 2009. Hann fann sig mjög vel í því námi og ákvað að hann þyrfti að læra enn meira um mannslíkamann. Næsta skref var sjúkraþjálfun. Strax um vorið ákvað hann að prófa inntökuprófið til að sjá hverju hann ætti von á árið eftir. Hann var við það að gefast upp í prófinu en komst inn í námið. Eitthvað sem hann hafði ekki planað og búið sig undir.
Í stað þess að bíða í ár með að byrja í sjúkraþjálfun ákvað hann að taka þetta bara bæði á sama tíma; klára seinni önnina í ÍAK og byrja fyrstu önnina í sjúkraþjálfun. Þetta var strembið en Skúli komst í gegnum ÍAK einkaþjálfarann og hin þrjú árin í sjúkraþjálfaranum.
Á meðan náminu stóð þjálfaði Skúli alltaf eitthvað með skólanum; í Sporthúsinu, World Class og svo í stuttan tíma í eigin aðstöðu ásamt 4 félögum sem fór svo hrikalega á hausinn. Hann starfaði einnig sem sumarstarfsmaður á Grensás sem aðstoðarmaður sjúkraþjálfara í tvö sumur. Skúli stundaði verknám á Reykjalundi,, Hrafnistu, Bata sjúkraþjálfunarstofu og hjarta- og lungnadeild Landspítalanum.
Skúli útskrifaðist með B.Sc. gráðu í sjúkraþjálfun vorið 2013 og fer þá í annað langt ferðalag um Asíu. Algjörlega peningalaus kemur hann heim, flytur heim til mömmu og pabba og vinnur í löndun og fiskvinnslu í nokkra mánuði.
Eftir að hafa komið undir sig fótunum kemst hann inn sem þjálfari hjá Reebok Fitness í byrjun árs 2014. Fyrir utan 2 löng ferðalög þjálfaði Skúli í fullu starfi í Reebok Fitness til 2021. Lengst af í Holtagörðum en sumarið 2018 flutti hann í göngufjarlægð frá sundlaug Kópavogs og byrjaði að þjálfa þar. Sjúkraþjálfunarbakgrunnurinn hjálpaði gríðarlega í þjálfuninni og var sérsvið Skúla í einkaþjálfuninni einstaklingar með einhverskonar stoðkerfisvandamál.
Skúli er mjög duglegur að lesa um allt sem tengist þjálfun og næringu og tók tvö heljarinnar námskeið 2016; CPPS réttindi og Precision Nutrition næringarþjálfunarnámskeið sem hann nýtir í að bjóða upp á 12 mánaða næringarþjálfun í takmörkuðum hópum.
Á vormánuðum 2018 kláraði Skúli svo CPPC, þjálfunarréttindi fyrir konur á meðgöngu og eftir barnsburð ásamt því að klára Level II næringarþjálfun hjá Precision Nutrition, sem var 12 mánaða stíft prógramm. Hann tók einnig námskeið í áhugahvetjandi samtali.
Eftir að hann eignaðist son sinn, hann Óðinn í September 2017 sinnti Skúli netþjálfun ásamt einkaþjálfun í sundlaug Kópavogs þangað til hann flutti til Grindavíkur og svo tímabundið til Svíþjóðar með fjölskylduna þar sem hann nam viðskiptafræði við Háskólann á Akureyri. Á þessu tímabili sinnti Skúli fjarþjálfuninni ásamt því að leysa af í Janus Heilsueflingu í Grindavík. Hann kláraði líka nýliðaprógramm í björgunarsveit og skellti sér í Fjallamennskunám FAS.
Í byrjun árs 2023 flutti Skúli svo til Grindavíkur þar sem hann fór í framkvæmdir á fokheldum bílskúr og var planið að breyta honum í sjúkra- og einkaþjálfunarstofu og var aðstaðan tilbúin í byrjun nóvember 2023. Skúli hafði einnig skrifað undir samning um sjúkraþjálfun fyrir vistmenn á hjúkrunarheimilinu Víðihlíð í Grindavík, var kominn með leyfi sem heimasjúkraþjálfari og var virkilega spenntur að hefja störf í Grindavík. Þann 10. nóvember, í jarðhræringunum á Reykjanesskaga gjöreyðilagðist þó bæði heimili og þjálfunaraðstaða þannig að þessir draumar urðu að engu.
Það þýddi bara nýtt upphaf, ný tækifæri og framtíðin óskrifað blað. Fjölskyldan fann fljótt húsnæði á Seltjarnarnesi, börnin fengu pláss í skóla og leikskóla og Skúli byrjaði að plana næstu skref.
